الجمعة، 13 يناير، 2012

#Medical #TahrirHeroes لا الحكومة ولا المجلس جادين في علاج مصابي الثورة وهذا الدليل

اسفة جدا بس مضطرة أحكي تفاصيل عن حالة مصابة بنتابعها تهدم مايقوله \ او يعد به دكتور حسني صابر أمين ما يسمى المجلس الأعلى لرعاية المصابين وذوي الشهداء : هو بيقول ان المصابين بيتعالجوا ف قصر العيني والمركز الطبي الرياضي (اللي هو لسه مش شغال اصلا) ..طيب امبارح كان عندنا حالة سيدة بتعالج من رصاصة فمحجوزة في مركز للعظام، بس عندها ضغط وسكر، المكان اللي بتتعالج فيه مافيهوش متابعة ولا باطني، ولا قاسوا السكر، حالتها اتدهورت جدا، مشاكل في الكلى، نزيف دم من الشرج، هي لوحدها وحالتها بقت اسوا، كلمنا الناس عشان تحويلها، لفينا بيها على العجوزة الخيري (مع الشكر لاستاذة عبير فؤاد ودكتور احمد عاصي وشكرا لاستاذ محمد زيات لنقلها بسيارته) ثم قصر العيني الفرنساوي (وانتظرنا نص يوم عشان يطلع جواب تحويل ليها ممضي من حسني صابر نفسه ! في الفرنساوي (اللي بيعالج مصابين الثورة حسب كلام جنزوري وصابر)  بقى قعدت منتظرة مافيش مكان في الرعاية من ابو بلاش. فضلت كده لحد نص الليل .. ايوه يوم كامل والمصابة على الوضع السيء ده ثم نقلها د احمد عاصي للهلال اللي بالصدفة فيه مكان فاضي ف الرعاية . هل دي المستشفيات اللي هاتعالج المصابين بافضل ما يكون؟ و اللي بتتكلموا عنها؟ مستشفى موش شغال، ومستشفى مش متكامل، او الرعاية اللاحقة فيه زبالة، ومشتفى تاني محدد اماكن بس لمصابي الثورة ولازم جواب ولازم ختم وكمان مافيش رعاية متوسطة وطبعا ولا هايدخلوا حالة رعاية مركزة الا بالطبل البلدي. الست دي كان ممكن ببساطة تموت امبارح عشان اللي خد قرار العلاج للمصابين في عدد محدود من المستشفيات عارف كويس ان الخدمات فيها اما محدودة او سيئة وانهم هايترموا في عنبر ويحظوا باقل الرعاية الممكنة مش افضلها ولا حاجة. ايه المشكلة لما نحول مريض لمكان افضل والحكومة تدفع؟ المشكلة انه هايعيش او هايتعالج بسرعة وترجع له صحته. ده اللي الحكومة الحالية مش عايزاه، انتوا عايزين تذلوا المصابين الحقيقيين موش اكتر. . بلاش تعذبوا المصابين الحقيقيين اكتر من كده، وبلاش تكذبوا عشان هانضطر نفضح تفاصيل كل كذبة

S C