الخميس، 15 أغسطس، 2013

لم يدع أحد للنزول غدا سواء في الميادين أو اللجان الشعبية #Egypt #Tahrir

 اللي هافف على نافوخه فكرة يروح يعملها من سكات ومن غير دعوة وتوريط للناس ورميهم في مصيدة. وتحميلهم مهمة حماية ولجان شعبية ودور غير منوط بهم اداؤه اصلا  ولا هم مدربين عليه ولا هو مجدي امام الرصاص والعنف المقابل اللي ممكن يواجهوه. فين الدولة؟ الشرطة اللي كانت بتتمرقع بعد جمعة الغضب؟ ده الست اللي بتولد بتقوم تشتغل قبل ما تربعن. ده انتوا من يوم 30 يناير 2011 خدتوا حوافز اثابة وامتيازات قبل ما دم اللي قتلتوهم ينشف. ولا لما ادتلعتوا ايام مرسي وقلتوا مش عاوزين محمد ابرهيم اصل مش مدينا صلاحيات ولا حصانة ولا تسليح (ماشي التسليح فعلا قليل وبدائي في مناطق بالذات سينا)  وقبلها اصل مرسي عاوز يورطنا في معارك سياسية. اي علاقة ده بانك كموظف منوط بيه تقديم خدمة عامة (اه رجل الشرطة موظف وممكن يترفد لو ماعملش شغلانته) وبتاخد مرتب وبدلات وحوافز وترفض تنزل تحمي محل بيتسرق؟ ولا مبنى بيتحرق؟ الشعب هاينزل بديل عنك بامارة ايه؟ 
 الشعب هايعمل نفسه شرطة ولا جيش اللي بعد التنحي 2011 ماكنش ينزل لو عاركة حصلت ولا حادثة الا قبل اخر ساعة في حظر التجول او لما يسقط قتلى، ايهما ابعد، على الاقل في امبابة وفي اشتباكات منشية ناصر ونفق السبتية ده كان بيحصل للاسف، ونفس الشيء دلوقت استغاثة في اكتر من حادثة ومامحدش بيسأل. ولا الجيش ولا الشرطة عندهم خطة عدلة ولا اجراءات احترازية اصلا للعنف المتوقع. انتوا يا جيش ويا شرطة بتتدلعوا او مرتبكين على احسن تقدير وسايبين الشعب يموت، ولما ييجي ناس نافوخها طاقق تدعو لمسيرات بكره زي الاخوان وناس برضه لاسعة تدعو لمسيرات مضادة او لجان شعبية، تفتكروا ده اللي هايعدل البلد ؟ وهيمنع الاقتتال ولا هايدفعوا اكثر؟
ماحدش ينزل 
ماحدش يعرض نفسه لمواجهة مع اخوان في مظاهراتهم بكرة.
ماحدش يقوم بدور الشرطة الا في منطقته لحمايتها وفي حدود.
دعوات طرزانية مش ناقصين والنبي وانزلوا ورونا نفسكم الاول 

S C