عزيزي يوسف بك بطرس غالي
ازيك كده
احب اعرفك اني عازمة حماتي وسلايفي السبت الجاي ده طوالي، فياريت تحجز لنا بيت السحيمي لجل العزومة، تمام زي حضرتك ما كنت هناك عامل عزومة سحور الاربع للبهوات صحابك ومعارفك على ما وصلنا.
بس احنا عاوزين فطار موش سحور، وعاوزين طقم الامن الشيك اللي كانوا مرشقين منطقة حي الحسين زي العزومة بتاعتك ..احنا برضه ناس مهمين.. وبيت السحيمي ملكية عامة واحنا مواطنين وعامة ورعية وعاوزين نستخدم الملكية العامة زي معاليك برضه . وياريت تحجز لنا لوحدنا بس العربيات ام عجل اللي شبه الطف طف بتاع البيلاج دي اللي بتلف المنطقة ومخصصة للمارة، عشان العيال اللي ها ييجيوا العزومة، تحجزها لنا مخصوص عشانا ومحدش يستخدمها غيرنا زي حضرتك وضيوفك ما قفلتوها عليكم دون الناس وعطلتم المرور .
صحيح بيت السحيمي بيتقال انه بيت اثري وتاريخي وسياحي .. بس ده ميمنعش برضه: ما كلنا نحب الاثار ونصنع التاريخ ونشجع السياحة..وزي ما حضرتك برضه من حقك تستخدم الاماكن المهمة دي لعزومات خاصة.. زي ما قصر محمد علي اتعمل فيه زفة محمد كمال .. حماتي وسلايفي برضه ناس مهمة بالنسبة لي، وعزومتهم واجب ولازم اعمل لهم شيء وشويات
وماتخفشي موش ها نزروت المكان
وياريت يا فندم ما تعلنشي عن العزومة ف الجرانين .زي عزومتك بالضبط.موش ناقصين قر
مع تحيات
أم فهمي
