نتانياهو واحدة ست !

بعد ضجة تلت مصافحته للرئيس الاسرائيلي شمعون بيرس قبل عامين، علق د. سيد طنطاوي -شيخ الأزهر المصري  وقتها “ماكنتش أعرف شكله" رغم ان بيرس معروف “شكله” منذ اواخر الستينات على الأقل كمسؤول في اسرائيل، وصوره تنشر بالجرائد والتلفزيونات.
ما علينا..
أمس الأول ظهر على موقع الفايس بوك شريط مصور لمطرب تونسي يحيي حفلا في "ايلات باسرائيل" و هتف بحياة  بنيامين نتانياهو؛ رئيس الوزراء الاسرائيلي  "يحيا بيبي نتانياهو" وبيبي  هو اسم التدليل له، ثم كرر: يحيا بيبي . قبل أن يدعو الموجودين لحضور احتفال معروف في تونس يعقد بعد فترة.
في رده علي انتقادات وجهت له حول هذه المشاركة، قال المطرب ان الموضوع قديم منذ عامين ثم انكر حدوثه، لكنه عاد في موقعه الرسمي ليقول أنه لا يعرف  من يكون  ناتانياهو هذا، وانه تصوره  اسم العروسة!
حجج متهافتة تعكس جبنا واستخفافا بمن تساق له من جمهور وعامة: ربما يجب تعميم صور وأسماء المسؤلين الاسرائيليين لحفظها، وساعتها: اللي عاوز يسلم او يهتف او يطبع يبقى مسؤول عن كلامه وأفعاله، واللي يعمل حفلة في اسرائيل او ارض محتلة من قبل اسرائيل ميقولشي كان فاكرها الأردن او ارمنيا مثلا،  ومحدش يقول لنا نتانياهو واحدة ست و إن يحيا بيبي  صيغة اشارة لمؤنث.
ياباي ع الجبن

موقع سلفي يهاجم أسطول الحرية، ويصفه بالانتحاري: غزة لا تريد سفنا يركبها نساء شقراوات مع رجال مسلمين ونصارى مع يهود ولا دينيين، ومن ماتوا ليسوا شهداء

اثناء "مراقبتي" لموقع ميمري اللي "بيراقب" الاعلام العربي والاسلامي لقيتهم كاتبين ده

Salafi Jihadi Sheikh Hussein Bin Mahmud: Gaza Does Not Want Freedom Flotillas with Blonde Women

شيخ سلفي (جهادي:مش كل السلفيين جهاديين )  بيهاجم اسطول الحرية، واحنا موش عاوزين شقراوات عشان غزة اللي عايزاه رجالة مسلمين، واليهود كذا ومذا، وهتلر ساب شوية منهم عشان يفهمنا ليه كان بيبيدهم.. الخ الكلام الاحمق اللانساني ده

المهم ده نص خطبة الشيخ من منتديات الفالوجة، واسمه حسين بن محمود(النقاط المشار لها أدناه مرقمة بحسب ترتيب ورودها بالخطبة.)

هو تقريبا شاتم كل الناس:  الجزائريين عشان معملوش مظاهرات كافية زي ايام ماتشاتهم مع مصر،  على الشعب التركي (هو بيقول لهم اللي عملوه موش كفاية) على الشيخ رائد صلاح (ازاي يروح مع ستات اجانب؟ وليه ماقلش لبقية الناس ان اسرئيل ها تقتلهم وكده يبقى انتحار) على المسلمين اللي كانوا في القافلة لانها "انتحارية"، على اللي موش مسلمين لأنهم موش مسلمين، وكمان اللي "اتقتلوا موش شهداء"  

أهم ما جاء في الخطبة "العصماء"المشار لها:

1. لو لم يكن يعرفهم الأتراك والجزائريون والغربيون واللبنانيون وغيرهم ، فإن الشيخ رائد صلاح يعرفهم جيداً ، فماذا كان يفعل في هذا الأسطول !!

2. إن الذين استنكروا على المجاهدين عمليات الإنغماس - التي يسميها البعض "العمليات الإستشهادية" – ويطلقون على هذه العمليات "عمليات انتحارية" حري بهم أن يستنكروا فكرة مثل هذه الأساطيل التي هي انتحار بمعنى الكلمة ..

3. كنا ننتظر اقتحام السفارات اليهودية وحرقها وملاحقة من فيها وقتلهم وقتل كل يهودي في تركيا وتهديد بقية اليهود في العالم بغضبة تركية تعيد ذكريات الدولة العثمانية الرهيبة

4. الشعب الجزائري الذي استشاط غضباً وكاد أن يخرج عن طوره عندما حدثت مشادّة بينه وبين صحف رياضية مصرية على خلفية مباراة لكرة القدم !! أين هو الآن من أسر يهود لبعض الجزائريين !! أم أن الهزيمة الكروية أشد وطأة على جباههم من اللطمة اليهودية !

5. إن اسطول الحرية هذا عملية انتحارية بمعنى الكلمة ، إذ كيف يرمي الإنسان بنفسه في يد عدوه – اليهودي- بدون سلاح !!

6. غريب أمر الذين طالبوا بتحقيق دولي !! هل غفلوا عن أن المنظمات الدولية يتحكم فيها اليهود !!

7. يريدون أن يتحاكموا إلى قوانين دولية أسسها اليهود وكتبوها وهم أدرى الناس بمداخلها ومخارجها !!

8. غزة لا تريد "سفن حرية" يركبها نساء شقراوات مع رجال مسلمين ونصارى مع يهود ولا دينيين ، بل تريد اسطولاً بحريا وجيشاً بريّاً برايات سود خراسانية شامية مصرية مغربية يمنية تركية كردية إسلامية تكون في شرقي نهر الأردن واليهود في غربيّ ذلك النهر ، والشرر يتطاير من عيون المسلمين ..

9. إن بعض المسلمين الذين خرجوا في هذه السفن التركية : خرجوا بنيّة طيبة ، وقُتل بعضهم ، فنسأل الله أن يرحم قتلى المسلمين وأن يغفر لهم ، ولكن لا يجوز أن يدعي مدّعٍ بأن له حق إعطائهم وسام "الشهداء" ، فهذه سنة نصرانية سنّتها البابوية باسم "صكوك الغفران"
10. الأمر الأشد غرابة من تحركات هذا الأسطول ، هو : الموقف التركي الشعبي !! كنا ننتظر من الشعب التركي أكثر مما رأيناه
 

والخطبة هنا ايضا لان سيرفر المنتدى الاصلي - الفاالوجة- احيانا يتعطل 

http://www.muslm.net/vb/showthread.php?t=390512

مقال ايمن نور في استقبال د. البرداعي ..لا حول الله يارب

ومقال لا يعرف التواضع لأيمن نور، يبدأه مقارنا بين يوم خروجه هو من السجن في ١٨ فبراير من العام الماضي ويوم عودة دكتور البرادعي لمصر: اليوم ١٩ فبراير. الأول كان محاطا بـ"زخم كبير من التوقعات والآمال والاحتمالات" أما الثاني فكان محاطا بالاحتمالات والتوقعات فقط دون الآمال!.
المقال يلخصه عنوانه "أهلا بالبرادعي لاعباً وليس مدرباً". ناسبا لنفسه انه اول من كسر حاجز الخوف المتبادل " ضربنا اول فأس فيه عام ٢٠٠٥" وان العام الذي تلا خروجه من السجن ساهم اكثر في كثر هذا الحاجز... مسكين.
وبعد ان يقارن بين اللاعب والمدرب في القدرة على تحمل الآلام، ضاربا مثلا بالملاكم الشهير محمد علي كلاي يقول "أهلاً بالدكتور محمد البرادعي شريكاً وليس منافساً" ...فهل هنا يملي (دعونا نقول يطرح) شروطا علي الرجل يوم وصوله؟ بالمناسبة المرء يختار شركاءه ولكنه لا يختار منافسيه.. وظني ان البرادعي ممن يختارون بعناية "اعداءهم" بنفس العناية التي يختارون بها اصدقاءهم ( موش كل من هب ودب ها يعاديه يعني)
انه يعدد ما يجب على السياسي أن يفعل مثل قوله "مستعداً أن ينتظر رنة تليفون في الخامسة صباحاً من أحد أنصاره يبلغه فيها باحتجازه أو اعتقاله بذات القدر من الاستعداد لتلقي رنة تليفون الساعة الثامنة صباحاً من قصر العروبة"
فهل هذا ما كنت تفعله؟ وهل كنت تفعله وحدك دونا عن الآخرين؟ او دون مساعدة من احد؟
ثم ينتهي بالقول "هكذا يمكن أن تكون علاقة البرادعي الجديدة بمصر.. زواج عن حب وليس جواز صالونات!!"
بالمناسبة: هل هذه الامثلة والمفردات من عالم الرياضة والزواج افضل ما يمكنك استخدامه لتوضيح ما تطرحه للنقاش يا ...دكتور؟
AFP
العمود هنا
http://www.dostor.org/authors/11/51/10/february/18/6866

Also read: حقائق وأكاذيب حول د. البرادعي- Facts & Lies about Dr. Baradei

معلومة مؤكدة الفايس بوك اتجنن رسمي

ايوه ! عشان كل شويه الاقي الناس اللي محذفتهاش ممكن اضيفها add as a friend ! والاقي الناس اللي لسه محذفونيش بيضيفوني عنديهم friend request .. ايه ده..يعني معقول لو حذفت الناس كلها احذف بنتي سمسمة مثلا ؟ طيب بالعند بقى: انا خلاص سجلت ف الفايس بوك المسيحي هو صحيح اتعطل فجأة بعد يومين فقط من العمل بس هايرجع ان شاء الله وباذنه تعالي يوم ٢٣ منه ولو في فايس بوك اسلامي ابقوا ابعتوا لي اسجل فيه هو كمان.  احنا هنا بنشجع كل الاديان وبنشجع المنتخب برضه. اه .الفراغ صعب ....وممنوع حد يلطش الصور من غير الاشارة للمصدر

ادي الجمل وادي الجمال

بعض الجرايد المعارضة والخاصة ها تدخل بقى ف تلسين نابع من ان الاخت "نيفين الجمل" اسمها لازم يكون "نيفين الجمال" زي ما كتبوه. وإن هو ده التعريب الصح لكلمة ElGamal ! أو إن الاجانب اللي كتبوا الاسم كده وخلاص.
وكل ما واحد ينشر نقلا عن التاني فها يبقى ده هو الصح من كتر التكرار.
وطالما هي الجمال؛ فلازم تكون قريبة خديجة مرات جمال؛ اللي هي من عيلة الجمال .. وعلى اساس في عيلة واحدة بس ف مصر محتكرة الاسم ده يعني او طالما بنفس اللقب- افتراضا- تبقى بنت عمها لزم!
وطالما من نفس العيلة يبقى حتما ولا بد التلسين (وحتي لو كانت البنت ضحية . و حتي لو كانت غلطانة عشان اتجوزت واحد متجوز وكمان اتجوز عليها: ماهو غلطة البنت لا تغتفر بقى. ولازم نشتم العيلة كلها باعتبار المسؤلية الجماعية. ونخلي الخاص يدخل ف العام وكده!) 
التقرير بتاع التايمز بيقول نيفين الجمل
والسيرة الذاتية بتاعة نيفين اسمها الجمل درست في اسكندرية.
القصة مهمة بالنسبة لي عشان اقارنها بقصة تانية خالص عن اللجؤ وطلب الحماية. لكن بالنسبة لناس تانية ها تبقي اللبانة الجديدة..امضغوا فيها لحد ما تخلص ولا يخلص حكمه؛ طالما هي دي طرق المعارضة الخايبة ليه.
ممكن تطلع واحدة تانية خالص غير دي؟ ممكن تكون من عيلة الجمال فعلا؟ جايز: بس حتى حينه لا يوجد من قراءة المنشور وباعمال العقل وبعض البحث ما يجعلنا ننسبها لغير عائلتها بالعافية . هي دفعة ٩٩ من فنون جميلة اسكندرية ومكتوب اهم الأماكن اللي اشتغلت فيها لو حد مهتم "موت" يعرف الاسم بالكامل وقريبة مين ..بس علي ايه ده كله يعني؟ واذا حتي اخت مرات ابن الريس: احنا مالنا..هي دي وسائل المعارضة الحديثة و"الناجعة"؟

 صورة سعيد بن احمد ال مكتوم - وكما على لسان محررة الموقع نفسها فهي والدته نيفين الجمل

علاء مبارك اتصل..وقال فرحوا الناس..حاضر

علاء مبارك اتصل وطالبهم يسعدوا الشعب المصري ..ايوه: اتصل بالمنتخب المصري لكرة القدم يعني ..بسمير زاهر رئيس اتحاد الكرة وحسن شحاتة المدير الفنى للمنتخب الوطنى للاطمئنان على بعثة المنتخب الوطنى لكرة القدم فى أنجولا قبل لقاء نيجيريا الثلاثاء.خاصة أنه:"نقل لهم تحيات السيد الرئيس وكل شعب مصر وأمنيات الجميع بتحقيق الفوز لإسعاد الشعب المصرى الذى ينتظر الفرحة" والله ده احنا فرحانين وسعداء يا استاذ علاء ..

وانا اللي على بالي انت متصل بناس تانية تفرحهم اكتر ما هم فرحانين، ولا تطمِّن على استعدادات تانية، ولا تاخد بخاطر حد عيان ولا متصاب ولا تعزي حد كده ولا كده ...مات له ابن ولا اخ
يالله: هو اصلا شكلنا ها نتغلب ..ماتش انجولا ومالي كله مفاجآت والنتيجة   4-4 واحنا بالعافية بنجيب جونين
اه و عاجبني موت حلقة ابراهيم حجازي النهاردة ..مستضيف اسماعيل احمد لاعبنا اللي محترف ف لبنان، وبيتكلموا طبعا عن كرة السلة- ما هو اسماعيل لعيب سلة موش قدم للاسف، وعمال يقول كل شوية حرام ننسى الرياضات التانية ، وان الحكم بتاع السلة بياخد 20 جنيه و30 قرش مكافأة الماتش .والتحكيم صعب وقواعده بتتغير كل فترة ..واسماعيل بيقول احنا ف مصر كنا بننزل ف فندق نجمتين وماياكلوناش كويس عشان كده موصلناش كاس العالم بتاع السلة من 94 ..(بجد؟)
هما تاعبين نفسهم كده ليه؟ .ده  لو يستضيفوا علاء مبارك في مكالمة تليفونية كده ها تبقى كرة السلة الرياضة الاولى في مصر ..حلال المشاكل الـــ......الرياضية
وللامانة كمان : حرص علاء مبارك على التحدث مع زاهر وشحاتة وشوقى غريب المدرب العام فى أمور خاصة بالفريق.
كمان بتشرح لهم خطة اللعب! مش بقول لكوا ها نتغلب

مصطفى بكري والضرس الذي خلع

قبل عشر سنوات بالتمام والكمال لم يكن لدينا كل هذا الفيض من الجرائد وما شابهها: اشي يومي واشي أسبوعي، ولم يكن الانترنت ومواقعه بهذا الانتشار..كانت تغطية جريدة أسبوعية صفراء لكنها تطبع على ورق ابيض واسمها الأسبوع لأحداث الكشح الثانية قبل أيام  - حيث قُتِل عشرون قبطيا ومسلمٌ واحد على ما اذكر- مفصلة وفي عدة صفحات، ولكن كل صفحة مختلفة عما تليها ..أو تسبقها ومفادها جميعا يخدم بطرف خفي فكرة  ان الحادث شنيع ولكن له مبررات  ومقدمات ...أقرأ التفاصيل باهتمام؛ فقد كان هناك أسماء عشرات المراسلين على كل مادة من هذه التغطية ...بالصدفة التقيت احد الزملاء ممن يعملون بمنظمة حقوقية أرسلت بعثة لتقصي الحقائق عما حدث.رواية مختلفة كثيرا عما قرأته في الأسبوع ..اذكر أنني أقسمت إلا أقرا الأسبوع وقد بررت بقسمي حتى قبل 3 أعوام إذ اضطررت لإلقاء نظرة على جرائم هذا الجريدة في تغطيتها للشأن العراقي عندما حتم علي عملي هذا الخيار المر.


أكتوبر 2000
أتبادل القليل من الكلام مع جارة لي في سكني القديم ..لا ادري ما الذي أتى بالحديث عن الضروس المخلوعة ..آه تذكرت كنت قد "خلعت" احد الضروس بعد أن زهقت من الذهاب 4 مرات لطبيبة مجرمة قامت بحشو الضرس دون ما يسمونه الحشو المؤقت ثم طبيب محترم افهمني أن هذا خطأ لأنني كنت بحاجة لعلاج عصب الضرس أولا أو شيء من هذا القبيل وفي النهاية قال خلاص، واقترح وعاد وزاد.. فقلت له أنا أيضا : لأ، خلاص.. اخلعه يا فندم


من هنا عندما شاهدت جارتي تضع يدها على خدها المتورم فبالطبع قلت: سلامتك..تحكي لي عن طبيبة الأسنان التي خلعت لديها ضرسها قبل أيام . لكنها أضافت أنها تتألم: لان الطبيبة عندما خلعته فقد قامت بذلك بكل بكراهية "ما هي أكيد شافت الصليب في ايدي"
اسقط أنا في يدي..جارتي تظنني مسيحية إذن.لكن لماذا تفسر الألم ومبعثه وسلوك الطبيبة هكذا؟ اعرف أن اعز صديقاتها مسلمة ..لكن هل كانت لتقول أمامها هذا الخاطر ؟


7 يناير 2010
أقرا تغطيات مختلفة لحادث إطلاق نار على مصلين خرجوا لتوهم من دار للعبادة في نجع حمادي ..لا ليسوا مسلمين حضرتك ولم يكونوا في مسجد ..هل كل العبادات صلاة المسلمين ؟ وهل كل دور العبادة مسجد؟
المهم فتح رجال عليهم النار بسلاح ناري محترم..ايوه ده اللي بتضبط إطلاق الرصاص بتاعه على مزاجك: 3 – 4 – 10 رصاصات مثلا في الثانية وتنش اللي قدامك!
قوم إيه يا محترم الناس كلها تتكلم على الحادثة وفق شهادة من شاهد،  وييجي الأخ مصطفى لوحده  ينشر في جرنانه ع الانترنت – وصلت لهناك بمحض الصدفة عبر البحث فلازلت ابر قسمي إلا أقرا هذا المنشور المسمى بالأسبوع – يقول لك في تفسير الحادث الذي لم تجف فيه الدماء بعد:
"وتردد بحسب شهود عيان أن احد المهاجمين يدعى "حمام الكمونى" من منطقة الساحل بنجع حمادي.. وكان الكمونى قد تعرض لحادث فقد على أثره وليده الجنين بعد عملية للولادة أجراها لزوجته طبيب مسيحي."
اصحاب العقول في راحة ..انت ها تبرر من دلوقتي يا عم ؟


يا راجل : يعني عاوز تقول انه في مبرر برضه للقتل ؟
موقع قبطي يتحدث عن مصادمات وعن احد اباء الكنيسة  نجوا من القتل وهو خارج لتوه مع الجموع من الكنيسة ..لكن شهود عيان تتصل بهم رويترز فيقولون أن هناك حظر تجول- الساعة تعدت الواحدة صباحا- وخروج الكاهن لا يكون غالبا مع المصلين بل بعدهم .
ماشي..
لا  ينقل الموقع القبطي مثلا أن حارس الكنيسة قتل – وهو مسلم – طبعا يجب أن نسال لماذا حارس واحد في يوم هام يتوافد فيه المئات على الكنيسة وفي بلد لم تفق بعد من حادث فتنة آخر، ايه الامن المصري ف اجازة بمناسبة العيد ولا ايه؟ .
موقع "اليوم السابق" تنقل عن الموقع القبطي السابق "روح الخبر" بس بعنوان أوسخ وهو : مصادمات طائفية بالمدينة.. كده خبط لزق..احنا لسه الساعة مجتش 1 بعد نص الليل(تحديدا 12 و55 دقيقية) رغم أن رويترز المحترمة نقلت عن شهود  "شوارع المدينة حاليًا خالية تمامًا من المارة والسيارات، ولا يوجد بها سوى قوات الأمن".
طبعا لا تجد داخل خبر اليوم السابق اي تفصيلة لهذا العنوان وف الاخر يقولوا لك "هذا ويتوجه مراسلنا الآن الى المدينة وسنوافيكم بالتفاصيل" ..هأو..


الحقيقة انه بخلاف ما أسرته لي الجارة الخائفة – كأي مواطن قبطي يعرف ان هناك احتمال لو 1 في المليون أن يقتل لمجرد انه من دين آخر-  فان هناك آخرون لا عذر لهم في إتباع مدرسة الأخ  مصطفى


اللي بتعكوا فيه ده ما يتقالشي حتى ف نميمة ستات فاضية ولا رجالة صايعة
ماشي يا مصطفى .. اقعد انت فبرك وعلم الناس الفبركة ...
روح يا شيخ ..اللهي ربنا يرزقك بمحامي محترم يرفع عليك قضية بلبلة وإشاعة فتنة وترويج شائعات وبث فرق
اللهي يطلع من بين الصحفيين اللي عندك -وأكيد فيهم ناس محترمة- واحد يقول لك عيب عليك..اللهي ربنا ينفخ في صورة البقية فياخدوا موقف من العك بتاعك، ولا يخافوا رئيسهم أو ينافقوه.
اللهي يرزقك بحد يتفرغ لفضح مدرستك في كتابة الأخبار التي تلد الشائعات بعد حمل لا يدم سوى دقائق.
اللهي ربنا يوريني فيك يوم يا مصطفى انت ومدرستك الصحفية اللي الحوش بتاعها مفيهوش علم مصر .. بس فيه جرس وجرد
تحديث(12يناير2010):

دلوقتي بقى عندي سؤال: فين ياموصطافا يا بكري حكاية الدكتور المسيحي بتاع النسا والتوليد والست المسلمة اللي ولدت والجنين- المفروض الوليد يا عبقري- اللي مات والاب المكلوم اللي عمل الجريمة (اللي هو حمام الكموني!) لهذا السبب كما ما روجت جريدة الاسبوع على موقعها الاليكتروني بعد دقائق من الجريمة يا باشا؟

بعدين عمل طلب احاطة يوم 9 منه ف مجلس الشعب وقال ازاي الجناة شايلين سلاح ومروا على 3 شوارع وهربوا وفين الامن. وامبارح بقى نازل شكر ف الامن ف برنامج اللي اسمه عمرو الديب

احنا بتوع العشوائيات

يعني لما مركز تنمية يقدم نفسه للاعلام والجهات المانحة باعتباره شغال ف العشوائيات، وقلبه ع العشوائيات، وبيطور العشوائيات، ويعيش يموت يصحى ينام يحلم بالعشوائيات، ويتصيت ويقبض على حس كده ..وبعدين تحصل مصادمات التلات اللي فات ف عزبة الهجانة،  ويموت نفر – بني ادم يعني- وتيجي الحكومة تهد البيوت على اصحابها وسكانها – حاجة زي قصة الطفلة مريم كده – فيكتفي هذا المركز الموقر – من السمك الوقار يعني- باصدار بيان يوم الخميس، ويقول انه ها يبدا في التشاور وموش عارف ايه.
لأ يا خفيف: لما تقدم نفسك انك شغال تنمية وحقوق اقتصادية واجتماعية يبقى مكانك هناك قبل الازمة ما تحصل، وقبل المصادمات ما تقع ..لان مفترض انك عارف  ومتوقع مسار الاحداث، والناس كلها كانت عارفة من ليلتها ايه اللي ها يحصل، الصحافيين والمراسلين عاملين تقاريرهم  من ساعة ما بدأوا هد ف مستشفى الجمعية بتاع الاخوان 7 ديسمبر، وصحفيين كتير مجهزين نفسهم وعارفين ان في حاجة ها تحصل الاسبوع ده .. الناس كلها كانت عارفة ان المصادمات ها تحصل ..حتى اللي موش بيشتغلوا كحقوقيين ف اللي اسمها ايه دي : العشوائيات، لامؤاخذة.
دورك انت بقى ايها الناشط الحقوقي تتدخل وتستبق الاحداث يا شاطر، توثق على الاقل،  وتساعد الناس وتقف معاها حتى لو بيتضربوا

السخيف خالد الجندي والفوز المصري على الجزائر

بجد بقى الراجل ده سخيف فعلا ..قال ايه النصر جه عشان اللعيبة "تابوا جميعا إلى الله توبة نصوح"تابوا عن ايه ان شاء الله بالضبط؟ .يا عم مين قال لك ان صلاح الدين معناه بالضرورة صلاح الدنيا؟ متعرفش حاجة اسمها المؤمن مبتلى مثلا( ده بس عشان طريقة تفسيرك للفوز) في كام واحد محترم ومجتهد وموش واخدين حقهم ف البلد دي؟ (يبقوا يستاهلوا وموش تائبين: ده معملوش حاجة وحشة اصلا، امال الاخرة والحساب والتعويض عن الابتلاء لزمتهم ايه مثلا؟ وفي كام واحد حرامي ولا قواد ولا مومس ولا كذاب ولا منافق بيصعدوا ف مناصبهم ويترقوا على اساس قدراتهم في الكذب والنصب والوقيعة و ...و....؟ (دي حاجات متستحقش التوبة؟ ها؟)

خلاص توبة اللعيبة هي اللي خلتنا ننتصر؟ وتابوا عن ايه بالضبط يا اخويا؟ طب ايه رايك ان الشوط الاول الجزائريين بيلوشوا وبيشوطوا ف الهوا كتير، وكنت مستغربة م المنتخب المصري انه موش عارفين او موش عاوزين يستغلوا ده، وموش عاوزين يخاووا الجون الاولاني بالتاني؟ قلت يمكن خطة يابت انهم..لا بلاش خليها بعدين ، افترض بقى اللعب كان كده ف الشوط التاني ومجاش جون عماد، ولا الوقت بدل الضايع كان دقيقتين ولا تلاتة وربنا قاسم الجون ييجي ف الدقيقة الخامس ليس الا: يبقى اللعيبة ما تابوش توبة نصوح بقى؟

في كام واحدة (ة) شكله تايب من قبل حتى ما يغلط، ويطلع ف الاخر فيه كل عبر الدنيا والاخرة؟ مين بيعرف بواطن القلوب غير ربك علام الغيوب يا سيادة الشيخ.

دي تصريحات خالد الجندي: روح يا اخي ربنا يسامحك: قرفتني ع الصبح

وبرز في هذا السياق دخول رجال الدين على خط الرياضة، مضيفين لمستهم الخاصة على الفوز، حيث قال الشيخ المعروف، خالد الجندي، إن الفوز جاء استجابة لدعوات ملايين المصريين بعد أن "تاب" نجوم المنتخب "توبة نصوح،" دون أن يوضح التوبة عن ماذا، مشيرا إلى أنه اتفق مع اللاعبين على أن تكون "كلمة السر" في اللقاء هي "يا حي يا قيوم."

وقال الجندي، في اتصال هاتفي أجراه معه برنامج "البيت بيتك" الذي يبثه التلفزيون المصري مشاء السبت، إن الفوز: "جاء استجابة لدعوات 89 مليون مصري."

وأضاف أنه "خطب الجمعة للمنتخب الوطني، واجتمع بهم مع المدرب حسن شحاته،" مؤكداً أن اللاعبين "تابوا جميعا إلى الله توبة نصوح."

وأشار الجندي إلى أن اتفق مع نجوم المنتخب المصري، الذي بات يعرف بـ"فريق الساجدين" بسبب سجود أفراده مع تسجيل كل هدف، على أن تكون كلمة السر في المباراة "ياحي يا قيوم
عن سي ان ان