- المنشور هنا مالوش صلة بترشح د البرادعي لرئاسة مصر او فرص نجاحه.
- اللي عنده انتقاد او معلومة سمعها او قراها عن الراجل يتفضل يحطها واحنا ندور على اصلها ونضيف الراوبط المدللة على ردنا.
يعني: * الناس بتقول عنده جنسية امريكية: موش صحيح فهو لا يحمل سوى الجنسية المصرية. الدليل ١ ... ٢.. ٣....
* الناس بتقول عايش في سويسرا .. لا. كان عايش مكان ما بيشتغل .. هو كان بيشتغل رئيس وكالة دولية مكانها النمسا؛ فطبيعي يعيش مكان اكل عيشه، موش هيسافر كل يوم يعني.
الناس بتقول ليه علاقة بالامريكان : ادونا الدليل وبعدين العكس هو الصحيح، زي ما اولبرايت كانت مصرة تمشي د بطرس غالي من منصبه الدولي بعد تقرير قانا (اللي فاكر بس) الامريكان اتجسسوا على البرادعي. وكانت فضيحة . وحاولوا قبلها يكرشوه من منصبه ، ويسقطوه في انتخابات الاعادة لنفس المنصب بعد رفضه لاستخدام تقارير الوكالة اللي شغال رئيسها عشان تبرير الحرب الامريكية على العراق : ونلطع اللينكات هنا. ( طبعا ده شغل المؤيدين للراجل بالاساس)
الهدف بوضوح ان المعلومات المغلوطة الي "حايمة" ف البلد حوالين الراجل بتبقى حقائق بعد فترة.ده عادي في مصر والعالم العربي للاسف. واللي بيرددها موش الناس العادية بس، لأ:كمان الناس اللي بتفك الخط كويس وبتدخل على الانترنت ( الانترنت أسوأ اختراع في مصر ) ودي مصيبة تانية ..معاه او ضده .. متفائل بفرص نجاحه او لأ.. ده موضوع تاني. لكن موش معقول كمية الاكاذيب اللي الناس بترددها دي . واحنا علينا دور في تصحيح ده موش قاعدين نتناقش مع اللي شبهنا بس، وسايبين البقية تردد او تصدق العك ده ... ده واحد بيسأل معاه شهادة ايه ؟ والتاني بيقول عميل واشنطن ..والتالت بيقول لك ميعرفش عدد محافظات مصر وانه مازرشي مصر من ٣٠ سنة! اذا انا شايفاه بعينيا اللي هياكلها الدود ف خان الخليلي من ٣ سنين راجل متواضع وماشي مع ضيفه ولا اي هيلمان ولا حاجة. يبقى ازاي ٣٠ سنة؟ انتوا حاسبين له من ساعة ما اتخرج م الجامعة ولا ايه ؟
تحديث: طيب انا في حد استقبل جملتي دي انها "دليل" بقدمه مثلا ردا على "كذبة" انه بره البلد ٣٠ سنة ..لا يا فتك . دي بيسموها جملة على الهامش، المعاقون لغويا يمتنعون، الردود اللي عاوزينها من الناس اللي بتأيده تكون موثقة، وطبعا موش انا اللي هاقدمها . و محدش اعتبر كونه بره البلد الفترة دي كلها انها "كذبة" في حد ذاتها. بس ده موش معناه برضه انه منقطع عن مصر تماما، ولا بيزورها ولا عارف مثلا كام محافظة عندنا ولا ايه مشاكل بلده .
وبعدين ايه قصة العراق دي ؟ غوغاء الانترنت من حملة "منديل" النضال الاليكتروني ضد جبروت امريكا مصريين وعرب ماسكين عليها؟ ده اكتر واحد كان رافض تبرير حرب العراق بربطها بملف اسلحة الدمار الشامل WMD، او اعطاء شرعية اممية- من ال UN يعني - لهذه الحرب. وفي النهاية وبسبب موقفه ده حصل ان ١- الامم المتحدة اقرت ان العراق دولة قانونيا تحت احتلال (وده كان من اهم القرارات اللي صدرت لصالح الشعب العراقي والا امريكا كانت هاتعمل العن من كده ف العراق ..وبسبب القرار العظيم ده لم يعترف بادارة بريمر او برايمر على قولة العراقيين رسميا ..)
Esam Shouman : أختنا أميرة ، أحييكي بشدة على هذا الإقتراح البناء.. بالنسبة لموضوع العراق واللي حصل حواليه لغط كبير جدا لازال مستمر حتى اللحظة ممن لا يريدون أن يبصروا نور الشمس طالما لم تشرق على هواهم ومزاجهم ، فهنا أضع الرابط لتقرير الوكالة الدولية للطاقة الذرية والمؤرخ في 14 فبراير 2003 ، والذي من المفترض ألا يدع مجالاً للشك في أن الدكتور البرادعي تعامل مع الملف العراقي وغيره من الملفات بمنتهى الحيدة والمهنية الصرفة ، فكان تقريره واضحاً بألا وجود لأي دليل على إستعادة العراق لبرنامجها النووي العسكري ، هذا التقرير وماسبقه من تقارير مشابهة التي وضعت الإدارة الأمريكية في حرج شديد وأرغمها على الذهاب للحرب بعيداً عن الشرعية الدولية. هذا الرابط فقط لمن لديه إرادة لمعرفة الحقيقة والإنحياز لها وحدها...
http://www.iaea.org/NewsCenter/Statements/2003/ebsp2 003n005.shtml
٢- بسبب موقفه ده حد كده - الله اعلم الامريكان ولا مين - قتل ممثل الامم المتحدة في العراق ونفر من موظفي الامم المتحدة في تفجير مهول في اغسطس ٢٠٠٣ فالامم المتحدة كلها هربت م البلد واللي فضل فضل ف الاردن وبكده امريكا برطعت ف العراق براحتها وطلعت لسانها للأمم المتحدة والبرادعي . ٣- اتجسست امريكا على مكالماته مع مسئولين ايرانيين عشان يشوفوا اذا ها يكرر موقفه الملتزم والقوي مع العراق فيما يتعلق بملف ايران النووي.
اللي يضحك اكتر ان الناس بما فيهم المستخدمون النشطون للانترنت - وكما عهدناهم - بيعملوا نفس الحكاية ... ترديد كلام بلا منطق او دليل ..
اخر نكتة: واحدة بتقول ده رجل علم وكده .. هههههههه هو تخصصه قانون ومنظمات دولية حتى لو كان رذيس وكالة الطاقة الذرية
Please, read also: