المتحدث العسكري "يمسح بوست" عن هجوم "ارهابي" على قائد الجيش الثاني واستخدام الأطفال كدروع بشرية

معظم المؤتمرات والتصريحات اللي بيقولها المتحدث الرسمي باسم القوات المسلحة (العقيد احمد علي) من ساعة ما تعين بعد احداث رفح اغسطس 2012 غير مهمة أو غير مفيدة وبعضها غير دقيق وبعضها غير صحيح بالذات ما كان يخص منها عمليات سيناء  أو ما سوق له باسم العملية نسر

النهاردة نشرت الموضوع ده عن مقتل طفلة مصرية في سيناء
http://kashfun.blogspot.com/2013/07/sinai.html
اول من نشر عن الحادث بواية اخبار اليوم وبعدها بعض الصفحات المؤيدة لمرسي برواية مختلفة تماما
الاتنين صياغتهم الخبرية بيخاطبوا بيها اعداء، ده بيشتم في ده ، وبيحمله مسؤولية مقتل الطفلة
بس عمليا مش مهم الطفلة عندهم
----
وبعدين جت صفحة المتحدث العسكري وبنفس الطريقة، ونشرت هي كمان رواية (اشمعنى هي يعني.. جات عليها؟)عن محاولة لاغتيال اللواء وصفي وان المهاجمين كان معاهم طفلة ف العربية واتصابت والجيش اكتشف وجودها بالعربية بعد ما الارهابيين هربوا (مسكوا واحد!) فنقلوها المستشفى
(وكاتبين اسم المستشفى غلط)
وماتت هناك
 وان الارهابيين بيستخدموا الأطفال دروع بشرية وده جزء من مخطط ضد الجيش الخ

الارهابيين ولاد كلب اه
ممكن يستخدموا اطفال دروع بشرية آه
وممكن يقتلوهم كمان اه
بس ما بيمسحوش البوستات بتاعتهم على فكرة
:)


وأدناه نص بيانه وهو حذفه بعد كده
وعلى فكرة ده عك وارتباك (وفي وقت أزمة) والالعن ان الجرايد بتاخد وتهول وتنقل
ده مصطفى بقري نفسه علق ع الموضوع واتهم اطراف 
الجرايد كمان بتكذب ساعات
..
ساعات كتير في الواقع 

فمش ناقصين ف جو الاكاذيب اللي بيغلف كل حاجة ف مصر تمسحوا البوستات !
دي دولة؟
ده جيش؟
ده شغل ناس مش محترفة
ممكن تبالغوا او تفبركوا بس راجعوا اللي بتقولوه كويس وماتمسحوش البوستات لو سمحتوا وشكرا
http://www.facebook.com/Egy.Army.Spox/posts/339247326206256