حد سنه فوق الـ21 ومفروض عنده عقل ودرجة نضج أو وعي: يستمر ف معركة لمجرد تثبيت موقف وبناء ساتر؟ (وحتى لو المظاهرة بدأت سلمية) بيفكرني بالمعارك اللي كانت في شارع قصر العيني ايام المجلس العسكري بعد احداث مجلس الوزرا بالضبط كانت عبث والشارع ضلمة والضرب من كل مكان والناس بتلوش بأي حاجة (ماكنش معاهم سلاح ع الاقل).
ليه الاصرار على البقاء قرب المنصة امام آلة القتل ؟ عشان تكمل تظاهر في مكان شبه فاضي من المارة بالليل؟ ايه العلة ؟ مين جابرك على كده؟ مين حط ف نافوخك ان دي شهادة؟ الداخلية فيها كل العبر، ومصدقة تماما انها ضربت نار، بس برضه في حاجة اسمها عقل تحتكم ليه. شايفين ضرب نار؟ في منكم حد بيرد؟ هو كده هاينتصر على الداخلية ومن معها في الجانب الآخر من الشارع؟ متخيلين ان دي معركة بجد؟ ده انتحار مش استشهاد، حتى لو القاتل دموي زي الداخلية. ليه الناس ما انسحبتش من اول ما الضرب بدأ؟ دي شجاعة يعني؟ بجد مش مفهوم بالنسبة لي والموضوع كله عبث. ولو مافيش حد عاقل من اللي بيسيروا المظاهرات لاز يوقف المهزلة دي. كفاية متاجرة بأرواح الشباب المصري علشان القيادات المجرمة للإخوان واشباههم. اعداد القتلى في الاحداث ستستخدم في التفاوض ليس إلا. افيقوا.