ما شاء الله . دولة القانون . والد أحد النشطاء مختفي بالنيابة العسكرية منذ ١٨ أغسطس بعد بلاغه ضد عميد بأمن الدولة #Jan25
وصلني هذا: بسم الله الرحمن الرحيم
بدون مقدمات كده وكلام كتير عشان انا مبحبوش
بقالى انا كام يوم بكتب ستيتس عن إني في الشرطه العسكريه
ومش هسيب حقي ولا حق إخواتي وكلام من ده وكتير من إصحابي بيتصلوا يسألوا
ولكن آن الاوان بقا اني اتحفكوا بما عندي من
مصيبه + ضغط + خير والحمدلله وانا مش هسكت برضو
بدء الموضوع بإن والدي إشترى قطعه أرض بمنطقه إسمها (( سهل الطينه )) ببورسعيد
وفي ظل دوله محترمه قويه يسود فيها العدل والقانون
إستولى عليها ظابط كبير برتبه عميد في جهاز أمن دوله وتحديدا في الإداره العامه في لاظوغلي
عميد : م.ع.إ ( من الشرقيه )ـ
وده كان قبل أحداث الثوره وتقدموا والدي ووالدتي بشكاوى ومحاضر وكل اللى نفسك فيه
ولأن مصر مكانش فيها فساد ولا محسوبيه كنت تقدم الشكوى من اللحظه ديا
وقبل ما يرجعوا بيتنا ويطلوا علينا الطله البهيه كان تليفون البيت يرن الرنه اللى هيا
ويتقالهم مش انتوا قدمتوا شكوى فيا هتعملكوا ايه يعني وتتضمن المكالمه بقا على شويه تهديدات من اللى هيا
وتسمع نص الكلام اللى انت كاتبوا في الشكوى والمهم ولا حياه لمن تنادي ومحاضر وشكاوى للوزير والتفتيش
وولا حاجه اتنقل بس من الاداره العامه في لاظوغلى راح مدينه نصر وبعدها بشهرين رجع تاني
المهم عشان انا مخنوق خلقه وبعد ما قومنا بالثوره كل اللى حولينا قالولنا آن الأوان ترجعوا مالكوا اللى منهوب منكوا وبسببوا والحمدلله وبكل فخر تم تدميرنا ولكن مش مهم قولنا الحمدلله في أمل اهو
فتقدم والدي في يوم 4-4-2011
ببلاغ ضد هذا الظابط وبالوقعه في سـ 28 في المحكمه العسكريه بالحي العاشر أملا في أن يعيد لنا المجلس العسكري حقنا كما وعد والمهم من يوم البلاغ ونزلت التهديدات علينا ثم في يوم الخميس الماضي الموافق 18-8-2011
والدي راح الشرطه العسكريه يتابع الموضوع واللى حصل فيه ومن يومها حتى الآن
والدي موبايله إتقفل تم إختفاءه ودورنا في كل حته
أقسام شرطه + مستشفيات + حتى المشارح قولنا يمكن إتقتل
وكل الفتره دي بندور في بورسعيد والقاهره ومفيش أخبار
ودي كارثه والكارثه التانيه انى اما روحت يوم الخميس اللى بعده 25-8-2011
أسأل عن المحضر ووالدي أولا دوخوني السبع دوخات من العباسيه للحي العاشر وفي الآخر قالولي
المحضر هيتحول نيابه عامه (( مدني )) فرديت قولت مينفعش الظابط مازال في الخدمه وكده بنفوذه ممكن تروح علينا
الرد : مش انتوا اللى عاوزين محاكمه المدنين امام محاكم مدنيه
رديت : مهو الخصم عسكري
قالوا : لا داخليه يبقى مدني
سألني صف ظابط هناك : هو والدك ليه نشاط سياسي قولتلوا لا من زمان سألني سؤال أغرب : أنت ليك نشاط سياسي .. رديت آه قالي عضو أحزاب .. قولتلوا لم أنضم لحزب قبل كده قالى انت في حركه معينه .. قولتلوا آه وعرفت هو يقصد إيه
قالى انت في حركه 6 إبريل ... قولتلوا أيوه ... بصلى وسكت ومكملش كلام وانا كمان مهتمتش بس كان غريب السؤال
فسألت عن المعتقلين اللى في السجن الحربي في الهايكستب فلاقيت إسم والدي مش فيهم
ولكن قالى واحد هناك قالى الأسماء اللى انت شايفها دي اللى داخلين رسمى وخلاص هيخرجوا ولكن الغير رسمي مش مكتوبين
ومش هتعرف عنهم حاجه وهو لو معتقل من الجيش مش هتعرف عنو حاجه
فالموضوع الوقتي يا إما والدي في إيد الشرطه العسكريه أو الكلب بتاع أمن الدوله قام بإختطافه
وبس
إيه العمل ؟!ـ
وأنا مش هسيب حقي وحتى لو الكلب ده بيضغط عليا انا برضو مش بخاف وده أنا متأكد منو تماما
أنا طالب من كل الناس انها تشير القصه دي في كل حته عشان كلنا نفوق للى بيحصل في البلد
وبجد شكرا لكل اصدقائي النشطاء السياسيين وغير النشطاء اللى واقفين جمبي وده اكيد اللى انا متوقعه
لأن مليش الوقتي غير ربنا سبحانه وتعالى ثم إنتم والحمدلله مش خايفين مهما حصل
---
name: Ahmed Metwaly (the father)
Son: AbdelHameed
dr_3abdelhameed@yahoo.com
Phone
0127225758 - 0163641105