الصورة لواحدة صاحبتي عراقية في براغ، أخدت الصورة دي ف متحف تماثيل من خمس سنين تقريبا ..ساعتها ما كناش متصورين السيناريو اللي حصل ف العراق لحد اللحظة اللي ها يتعدم فيها صدام.. مبروك ..ولو أنا قلقانة من تاثير تنفيذ الحكم على الوضع الأمني اللي هو بالفعل سيء جدا ف بغداد ومحافظات كتير، وكمان مضايقني ان الحكومة الحالية ها تنسب لنفسها الفضل وطبعا ماحدش ها يكلمها ربع كلمة على الفساد والطائفية على الاقل لفترة بعد الاعدام، والناس ها تتلهي في احتفالات ونحوه ودي برضه فرصة لهجمات جديدة على المدنيين
لكن برجع واقول خلينا نخلص كده كده ها يحصل اضطرابات
كمان المحاكمة كانت قصيرة قوي وكان ممكن تبقى افضل لو امتدت لحد اخر لحظة ف عمر صدام ، لو طلعوا كل المستخبي، لكن واضح ان في ناس من مصلحتها محاكمته تخلص بسرعة .. المحاكمة اللي تمت كانت على انتهاكات لحقوق اكراد وشيعة بالأساس في حين ان هناك كثير اضيروا من صدام منذ عام 59 لما كان لسه ارهابي صغير بمسدس، ولو على الاكراد لازم كانوا يجيبوا سيرة الاكراد الفيلية اللي اتهجروا واتقتلوا من نهاية السبعينات و اتنهبت ممتلكاتهم لكن طبعا همه مالهمشي حزب شايل سلاح ولا هوماش - غالبهم - مربطين مع دولة كبرى اقليميا ولا عالميا فمحدش بيسال عن حقوقهم لدرجة ان اللي رجعوا منهم للعراق بعد سقوط حكم صدام لم يتمكن كثير منهم من استعادة و لا منزل ولا محل واحد من املاكه هو اوعائلته بصورة قانونية. لأن الحكومة مأجلة النظر في مشكلتهم عاما وراء اخر.
ادام بيتي ف بغداد كان في بيت عم سليم كردي فيلي .. وحواليه 3 بيوت كلها مملوكة لاعمامه ووالده لكن ما قدرشي يرجعهم و الناس اللي فيهم مبلطجين! عم سليم واحد من بين الاف الفيلية اللي اعتقلوا وهو صغار قوي واترموا ف السجون و كتير منهم اتعدموا لكن سليم حظه كان كويس جدا جدادخل المعتقل من سنة 80 وطلع في العفو العام بتاع صدام في نوفمبر2002 شعره كله شايب ، ويوم لما مسكوا صدام 17 ديسمبر03 ،سليم الوحيد تقريبا من الشارع اللي ما طلعشي يضرب نار . ف الهوا والوحيد من جيراني وقتها اللي كنت نفسي اشوفه ساعتها واقوله مبروكموش عارفة ايه احخساس الناس ف بغداد دلوقتي ..بالذات اهالي الضحايا ..
كلمت عيلة صديقة في الجنوب وهمه تقريبا مشغولين خالص بتفاصيل تانية زي رب الاسرة الطبيب اللي قفل عيادته بسبب تهديدات وبيفكروا يروحوا على سوريا لكن معوهمشي فلوس كفاية لان الاسرة كبيرة - ولدين و 4 بنات - كل البنات توقفوا عن الذهاب للمدراس باستثناء واحدة بس في متوسطة= اعدادي عندنا ، والبنتين الكبار خلصوا ثانوية عامة بمجموع كبير و كان املهم يدرسوا في بريطانيا مرة واحدة- دلوقتي برضه قاعدين ف البيت- العيلة مأجلة السفر لسوريا لسبب غريب هو :
ان الطريق نفسه موش امان و كمان المستقبل في سوريا موش مشجع حتى لاصحاب المهن، حقيقي مكتئبة رغم كرهي لصدام لكن كتير من الحمقى اللي ماسكين العراق دلوقتي ما ينفعوش حتى يمسكوا وظيفة فراش في زمنه ،
موش عارفة، احنا صاحيين للصبح والبعض على اتصال بين لحظة و التانية باصحابنا العراقيين،
يارب ارحم العراقيين بقى ويارب همه كمان يفوقوا ..
صدام في اخر ضحكة19ديسمبر06